Vendimi i Kroacisë për të ekstraduar në Serbi Ismail Morinën ka vënë në lëvizje shtetin shqiptar. Ministri i Drejtësisë Gazment Bardhi, i ka bërë një kërkesë homologut të tij kroat, ku e cilëson si të parregullt kërkesën e Serbisë për ekstradimin e Morinës.
Sipas Bardhit, ajo nuk përmbush kriteret e pranimit sipas Konventës Evropiane për Ekstradim dhe “Paktin Ndërkombëtar” për të drejtat civile dhe politike.
“Kërkesa për ekstradim bie ndesh me Konventën e Këshillit të Europës “Për ekstradimin” dhe Paktin Ndërkombëtar për të Drejtat Civile dhe Politike”, thuhet në njoftimin e Ministrisë së Drejtësisë.
Ministria e Drejtësisë ka shpjeguar do të paraqesë pranë institucionit homolog kroat, të gjitha faktet dhe provat që dëshmojnë se “jemi përpara një shkelje politike, për të cilën bazuar në nenin 3 të Konventës së Këshillit të Europës “Për ekstradimin”, nuk mund të akordohet ekstradimi.
Ministri i Drejtësisë në kërkesën drejtuar autoriteteve kroate ka argumentuar se në rast ekstradimi në Serbi, shtetasi shqiptar Ismail Morina rrezikon t’i nënshtrohet përndjekjes, persekutimeve apo diskriminimeve të motivuara politikisht për shkak të shtetësisë së tij dhe gjendjes personale apo shoqërore, çka përbën shkelje të drejtave themelore të njeriut, që duhet të pengojë miratimin e kërkesës për ekstradim.
Në këtë mënyrë, Ministria e Drejtësisë ka kërkuar bashkëpunimin e Federatës Shqiptare të Futbollit për t’i vënë në dispozicion të gjitha faktet dhe provat që dëshmojnë përdorimin politik nga autoritetet serbe të ngjarjes së ndodhur në stadiumin e Beogradit në tetor të vitit 2014, si dhe si dhe sjelljes çnjerëzore të tifozëve dhe personelit serb të stadiumit ndaj ekipit kombëtar shqiptar, me qëllim provueshmërinë e rrezikut real që i kanoset shtetasit Ismail Morina për shkak të shtetësisë së tij shqiptare në rast ekstradimi në Serbi.
Po ashtu edhe FSHF nëpërmjet një lajmërimi në faqen e saj në internet ka bërë të ditur se Presidenti i Federatës, Armand Duka ka patur një komunikim intensive me kryeministrin e vendit Edi Rama për këtë problem. Kreu i Ekzekutivit së bashku me Presidentin e FSHF kanë marrë kontakt të vazhdueshëm edhe me autoritetet kroate për zgjidhjen përfundimtare të procesit.
