Një prej studimeve më të fundit të psikologjisë thotë se të përfshihesh në grupe sociale dhe të shoqërohesh me shumë njerëz është forma më e mirë për të lehtësuar dhimbjen, dhe madje kjo ka më shumë efekt sesa përdorimi i ilaçeve.
Të prekurit nga sëmundje afatgjata si diabeti ose osteoporoza do të kenë më shumë lehtësim nëse zgjedhin të menaxhojnë dhimbjen përmes kryerjes së aktiviteteve si kopshtaria ose ndjekja e klubeve të vallëzimit, zbuloi studimi. Klasat e tilla gjithashtu ndihmojnë pacientët të ndihen më pak të izoluar shoqërisht, ndërkohë që rrisin vetëbesimin dhe pavarësinë e tyre.
Njerëzit që morën pjesë në studim thanë se përfshirja sociale i bëri më aktivë, i ndihmoi të humbnin peshë dhe të ndiheshin më pak të shqetësuar dhe të izoluar. Megjithatë edhe nga eksperiencat personale ne të gjithë kemi provuar se momentet stresante dhe shpesh depresive kalohen më lehtë pranë miqve dhe shokëve. Fakti që jemi të rrethuar nga shumë njerëz na largon nga mendimi se jemi vetëm.
