Në deklaratën e përbashkët të lëshuar nga Arabia Saudite, Emiratet e Bashkuara Arabe, Egjipti dhe Bahrejni thuhet se: “Sanksionet do të vazhdojnë deri sa Katari të përmbushë kërkesat tona të drejta, mes të cilave përfshihet lufta kundër terrorizmit e cila mundëson sigurimin e stabilitetit në rajon”.
Katër vendet në këtë deklaratë theksojnë se memorandumi i mirëkuptimit të nënshkruar dje mes Katarit dhe SHBA-së për parandalimin e financimit të terrorizmit, vjen si rezultat i kërkesave dhe presioneve të bëra për një kohë të gjatë prej tyre, ndërsa vazhdojnë më tej se “Pa një kontroll të rreptë që do të vërtetonte seriozitetin e këtij vendi, nuk do të besohet në angazhime që do të jenë të lidhura me politikën aktuale”.
Kriza e Gjirit filloi me ndërprerjen e të gjitha marrëdhënieve diplomatike të Arabisë Saudite, Egjiptit, Emirateve të Bashkuara Arabe dhe Bahrejnit me Katarin.
4 vendet Arabe mes kushteve për të rivendosur marrëdhëniet me Katarin kanë kërkuar, mbylljen e bazës ushtarake turke, ndërprerjen e marrëdhënieve me Iranin dhe mbylljen e kanalit televiziv Al Jazeera. Ndërsa Doha zyrtare ka deklaruar se nuk do të pranojë asnjë kërkesë e cila është në kundërshtim me ligjet ndërkombëtare.
TIRANA TODAY
