Eduard Selami ka theksuar para demokratëve se platforma e tij synon të rikthejë të djathtën në identitet. Gjatë turit të tij, Selami u takua sot me strukturat e Qarkut të Tiranës, ku sulmoi drejtpërdrejt Bashën, teksa tha se asgjë nuk zgjidhet duke gjetur gabimet tek tjerët, si dhe shtoi se PD ka braktisur shtyllat kryesore.
“Po vazhdojmë të humbasim se kemi braktisur demokratët, kemi braktisur strukturat, kemi braktisur demokracinë dhe do të rikthehemi më të fuqishëm vetëm kur të vendosim këto themele, më të forta se i kemi pasur.
Është koha për një analizë të sinqertë, dhe t’i shikojmë gjërat në sy. Nuk mjafton të shohim ça bën kundërshtari, kundërshtari atë punë ka. I përkas atij grupi që kur diçka nuk shkon, gabimin e gjej të vetja. Njerëzit që shikojnë në dritare për të fajësuar të tjerët, nuk janë ata që ecin përpara dhe kanë sukses”, tha Selami.
Ai thotë se në këto zgjedhje do fitojë modeli bashkëkohor i lidershipit, që sipas tij fatkeqësisht Shqipëria nuk e ka. Por si më të rëndësishëm, Selami, sheh që nga ky proces, Partia Demokratike të dalë e bashkuar dhe të gjejë rrugën e ringritjes.
“Unë jam i bindur që në këto zgjedhje do i fitojë modeli bashkëkohorë i lidershipit që fatkeqësisht Shqipëria e ka humbur. Po kaq ka rendësi që nga ky proces të dalim të bashkuara të ringrihemi, kundërshtari nuk është mes nesh”, tha Selami.
