Vala e nxehtë që ka mbërthyer të gjithë vendin dhe rritja e temperaturave mbi vlerat e zakonshme e bën të domosdoshme ndërmarrjen e disa masave për parandalimin dhe trajtimin e efekteve anësore të nxehtësisë mbi shëndetin.
Rekomandimi i parë që vjen nga ekspertët është të evitohet ekspozimi në diell, sidomos në pikun e temperaturave, si dhe të konsumohet shumë ujë. Megjithatë rëndësi të madhe ka edhe mënyra se si ushqeheni. Më poshtë do të gjeni disa super ushqimet më të shijshme dhe më të shëndetshme të verës. Nga ananasi deri tek misri, këto super ushqime, të pasura me vitamina dhe minerale, do t’ju mbajnë të shëndetshëm dhe hidratuar njëkohësisht, thuhet te Shëndeti Online.
Avokadot
Avokadot janë një burim i pasur i yndyrave të shëndetshme. Prandaj duhet të konsumoni avokado gjatë gjithë verës. Acidi oleik, i gjendur tek avokado, mund të ulë nivelet e kolesterolit të keq (LDL) dhe të rrisë ato të kolesterolit të mirë (HDL). Acidet yndyrore omega tek avokado është treguar gjithashtu se kanë efekt pozitiv tek sëmundjet kardiovaskulare.
Frutat e pyllit
Frutat e pyllit si manaferrat, luleshtrydhet apo boronicat duhet të jenë këtë vit përbërësit e parë tek sallatat e frutave. Këto fruta janë të pasura me fitokimikate të fuqishme (si antioksiduesit). Frutat e pyllit mbrojnë shëndetin e zemrës dhe ndihmojnë në menaxhimin dhe parandalimin e diabetit.
Qershitë
Nuk duhet ta kaloni verën pa tasin e mbushur plot me qershi ose vishnje. Ekspertët rekomandojnë konsumimin e qershive për të ulur inflamacionin falë numrit të madh të antioksiduesve.
Misri
Misri është i pasur në antioksidues dhe kalium. Dhe, mos u shqetësoni në lidhje me përmbajtjen e sheqerit në misër: ky mit është hedhur poshtë sepse sipas studimeve misri në fakt përmban më pak sheqer se mollët.
Shalqiri
Nëse mendoni që shalqiri është pothuajse ujë dhe nuk ka asnjë vlerë ushqyese e keni shumë gabim. Ky ushqim veror është i pasur në antioksidues, vitaminat A, B dhe C, si dhe aminoacide.
