Deputetja aktuale e Partisë Demokratike Mimoza Hajdarmataj ka hedhur poshtë pretendimin sipas së cilës kandidati për kreu e selisë blu Eduard Selami është kërcënuar nga shoferi i saj, Alfred Dalipi në ambientet e kësaj partie.
Në një prononcim për ‘‘Tirana Today’’ Hajdarmataj thekson se ky është një lajm i shpikur krejtësisht nga Selami, pasi përballja me shoferin e saj në hollin e selisë blu ka qenë vetëm një përshëndetje miqësore dhe aspak kërcënuese, kur ai i është drejtuar Selamit vetëm me fjalët: Po ti ku ke qenë?!
Hajdarmataj shpjegon se një person si z. Selami që pretendon të marrë kreun e selisë blu, nuk mund të bjerë në nivelin e një militanti të Partisë Demokratike. Ndaj sipas saj, gjithçka është një trillim nga ana e z. Selami.
Reagimi i Mimoza Hajdarmataj:
Unë nuk kam asnjë shofer timin personal. Unë e drejtoj vetë makinën. Vetëm ndonjëherë kur më ndihmon ndonjë nga djemtë që të parkoj makinën tek oborri i partisë. E lexova lajmin. E pyeta personin pasi kam njohje me të: -Ç’është ky lajm? Më tha që nuk është i vërtetë: ‘‘Ka hyrë vetë z. Selami në korridor. Unë kam qenë në hollin e Partisë Demokratike dhe z. Selami ka ardhur dhe më ka dhënë të njohur, (ai është një militant i hershëm i PD-së). Erdhi na përshëndeti dhe u përshëndetëm’’ Dhe vetëm kaq i ka thënë: Po ti ku ke qenë deri tani? Asnjë kërcënim! Ky është një lajm i rremë që z. Selami mund ta ketë prodhuar vetë. Është banale ta lidhësh me faktin se është shoferi i këtij apo kushëriri i atij. Nuk më shqetëson kjo pasi tani nuk kam më shofer. Por, u shqetësova për shkak të rastit. Po të isha në vend të tij e ndiqja në çdo aspekt që të shikoheshin kamerat. Unë nuk e kuptoj se për çfarë arsyeje z. Selami e ka furnizuar median me këtë lajm. Kjo më duket gjëja më ordinere e mundshme. Unë tani nuk po shkoj në PD dhe as kam kohë të angazhohem pasi pas fushate po merrem me familjen. Z. Selami po të dojë të bëjë denoncim dhe policia ta shohë nga afër, të hapen kamerat dhe del që është mashtrim. Niveli i një shoferi me një që synon të bëhet kryetar partie dhe mua më bën sens vetëm shpjegimi që më ka dhënë Alberti, i cili i ka thënë vetëm kaq: Ku keni qenë deri tani.
Incidenti
Ndërkohë me herët në media u publikua lajmi se shoferi i deputetes Mimoza Hajdarmataj, Alfred Dollapi i është drejtuar me një gjuhë të ashpër Selamit, pak minuta pas konferencës për shtyp duke e kërcënuar atë.
“Çfarë pune ke ti këtu, ça do këtu? Nuk të lë as të hysh në selinë e PD, pasi nuk ke çfarë kërkon këtu?”, i është drejtuar shoferi i Selamit.
Kandidati për kreun e PD-së e ka pranuar dhe në media incidentin duke deklaruar se “Pati një incident të pakëndshëm sot në selinë e Partisë Demokratike që unë më vonë e mësova se kush ishte. Megjithatë unë do shoh përpara dhe e rëndësishme është gara në PD”, është shprehur Selami për gazetën Panorama.
