Pavarësisht se dita para zgjedhjeve përbën heshtjen zgjedhore, politikanët nuk ndalen për të bërë propagandë me synim për të ndikuar tek votuesit.
Kryeministri në detyrë, Edi Rama dhe lideri i opozitës Lulzim Basha, kanë përdorur fëmijët e tyre këtë të shtunë për të influencuar në sjelljen e votuesve.
Edi Rama
Kryeministri Edi Rama e nisi që mëngjesin e ditës së sotme thirrjen e tij ndaj votuesve duke iu prezantuar një video të qyteteve të Shqipërisë të filmuara nga lart, ku vërehet ndërhyrja në fasadat e tyre dhe të cilat kreu i qeverisë i cilëson me krenari si ‘‘Rilindje Urbane’’.
‘‘Mirëmëngjesi dhe ju uroj një të shtunë sa më të qetë’’, shkruan mbi video Rama, një përshëndetje që bart edhe pjesën e ironisë për një ditë sa më qetë e cila i përkon heshtjes zgjedhore.
Megjithëse spoti nuk kishte asnjë sigël të mbivendosur mbi të, ai tenton të ndikojë sadopak votuesin duke e orientuar drejt mesazhit të tij politik.
Kjo është një teknikë e njohur e marketingut politik, e cila pavarësisht mungesës së sloganeve në mesazhin transmetuar, videoja kërkon të nxjerrë në pah sesi i ka zhvilluar qytetet qeverisja socialiste. Ndërsa iu përgjërohet qytetarëve për një mandat të dytë.
Ai nuk e ndërpreu komunikimin e tij me votuesit duke postuar në profilin e tij në Facebook, një foto dhe video me të birin, ndërsa luan futboll me të.
Gjithashtu, edhe në këtë rast, Rama kërkon të tërheqë sa më shumë votues duke prekur ndjeshmërinë e tyre përmes lojës me të birin; kryeministri që luan me të birin një ditë para zgjedhjeve. Një imazh i përsosur elektoral.
Lulzim Basha
Nga ana tjetër, kreu i opozitës Lulzim Basha ka publikuar një foto në profilin e tij në Facebook, ku shfaqet i relaksuar pranë dy vajzave të tij dhe bashkëshortes së tij, Aurelës. ‘‘E shtunë pasdite’’, shkruan Basha mbi foto.
Ashtu si në rastin e kryeministrit Edi Rama, edhe kreu i opozitës Basha, kërkon të ndikojë tek votuesit e tij duke paraqitur anën më të ndjeshme; atë familjare. Megjithëse nuk ka asnjë logo apo simbol që mund ta kategorizojë si mesazh politik drejtuar qytetarëve, fotoja vendos një urë komunikimi politik nisur edhe nga konteksti i situatës politike aktuale.
Në dukje na shfaqet një panoramë normale e jetës familjare edhe pse të angazhuar politikisht, por publikimi i fotove që kërkojnë të ndikojnë votuesit një ditë para zgjedhjeve është një përpjekje për të tërhequr sa më shumë vota në kutitë e tyre të votimit.
Nisur ky aspekt, komentuesit bëjnë edhe urime të tilla: 
Kodi Zgjedhor
Kodi Zgjedhor është shumë evaziv në këto raste dhe vetëm sa bën një përgjithësim. Kodi parashikon gjoba për subjektet politike që thyejnë heshtjen zgjedhore.
‘‘Subjekti zgjedhor që thyen heshtjen zgjedhore, sipas nenit 77 të këtij Kodi, gjobitet nga KZQ-ja me 500,000 lekë’’, shkruhet në nenin 174 të Kodit Zgjedhor.
Tirana Today
