Deputet dhe kandidat për në legjislaturën e re parlamentare, ish-sekretar për Çështjet Ekonomike në Partinë Socialiste, Ervin Bushati, duket se nuk e ka fare idenë ç’ndodh me ekonominë në të vërtetë në vendin tonë. Referuar profilit të tij spikatës në fushën e ekonomisë, anëtar i paneleve televizive në cilësinë e ekspertit të ekonomisë, por edhe pozicionit të rëndësishëm që ka mbajtur në selinë rozë, padyshim që Bushati është edhe njëri prej hartuesve të programit ekonomik me të cilin kjo forcë politike erdhi para elektoratit në këtë fushatë.
Ervin Bushati deklaron se paga minimale në vendin tonë është 375.000 lekë. Madje ai thotë se edhe ky nivel nuk është i mjaftueshëm. Në një intervistë dhënë për “Tirana Today”, Bushati shprehet: “Që prej 1 Marsit të 2017 paga minimale është rritur. Paga e ulët, nga 220 mijë lekë të vjetra që ishte, tashmë është 375 mijë lekë të vjetra. A është mjaft, jo nuk është. Është hera e parë që bëhet një rritje nominale e rrogave dhe pensioneve, por nuk është hera e parë që lihen më shumë para në xhep për ju, për qytetarët, sepse ne e filluam mandatin duke ulur taksat. Qeveria ka hequr nga buxheti i shtetit për rritjen e pagave dhe pensioneve 100 milionë dollar, por duhet të theksoj se kjo nuk ka rritur borxhin publik, ndërsa ndryshe ka ndodhur me qeverisjen demokrate ku në 8 vite ndanë për pagat dhe pensionet 124 milionë dollarë”.
Deklarata e Bushatit rezulton të jetë gafë e pafalshme, nëse do t’i referohemi VKM-së Nr. 399, datë 3.5.2017, i cili rrit pagën minimale në 24,000 lekë, nga 22.000 lekë, rritja e parë që iu bë këtij niveli page prej tre vitesh, duke shfuqizuar VKM-në nr 573, datë 3.7.2013.
Por, Bushati jo vetëm që nuk paska qenë në dijeni të kësaj VKM-je, i cili u trumbetua si sukses i qeverisë, por paska qenë i pavëmendshëm edhe ndaj premtimeve të kryeministrit dhe kreut socialist Edi Rama. Ky i fundit gjatë takimeve elektorale ka premtuar se mandatin e ardhshëm, nëse do vijojë të drejtojë qeverinë, do të ngrejë pagën minimale në 30.000 lekë.
“Ne jemi të bindur se mund të çojmë ekonominë tonë mbi 5 % nëse na jepni timonin. Në katër vitet e ardhshme do të rrisim pagën minimale në 30 mijë lek, rrogat do t’i rrisim 40 % dhe do të rrisim çdo vit pensionet”.
Kjo është vetëm një prej deklaratave të përsëritura thuajse çdo ditë gjatë muajit elektoral nga kryeministri Rama, gjë të cilën Bushatit nuk ja paska zënë veshi gjëkundi./TIRANA TODAY
