Loja e rrezikshme që po merr jetë adoleshentësh ka mbërritur edhe në Gjirokastër. Rasti është zbuluar nga shokët e klasës së një 12-vjeçareje, të cilët kanë konstatuar në trupin e adoleshentes shenja të vetëplagosjes.
Lajmin e ka dhënë drejtoresha e Drejtorisë Arsimore Rajonale, Lindita Rova, e cila ka denoncuar rastin në zyrën e Krimit Kibernetik.
Mësohet se vajza ishte në nivelin 33-të të lojës dhe kishte 10 ditë pa ngrënë.
Loja online e quajtur “Balena Blu” mund të ketë vrarë mbi 140 fëmijë dhe adoleshentë vetëm në Rusi, por duket se përbën rrezik potencial edhe për fëmijët shqiptarë, pasi ka mbërritur prej kohësh në rrjetet sociale të adoleshentëve më së shumti në Messengerin e Facebook-ut.
Torturat e njëpasnjëshme nga kërkesat e një të panjohuri nisin përmes një presioni psikologjik dhe fëmijët krijojnë varësi nga një njeri i panjohur përtej kompjuterit. Fëmijëve iu kërkohen sfida të vështira dhe të dhimbshme, si p.sh të presësh veten me thikë, të zgjohesh në orën 4:20 të mëngjesit për të parë videot horror që të dërgon personi anonim dhe sfida të tjera të dhimbshme që i jepen fëmijës për 50 ditë, deri në sfidën e fundit: Të hidhen nga tarraca e një pallati të lartë për t’u shpallur fitues i sfidës.
