Nëpërmjet një denoncimi publik, këshilltarët e LSI-së në Bashkinë Vlorë, kanë kërkuar shkarkimin e kryetarit të Bashkisë duke pretenduar se ky i fundit ka shkelur ligjin.
Këshilltarët, pretendojnë se kreu i Bashkisë, Dritan Leli, nuk i ka dhënë të drejt subjektit të tyre politik, për mbajtjen e tubimeve gjatë fushatës elektorale.
Sipas tyre, Bashkia e Vlorës i ka dhënë Partisë Socialiste një shesh publik, që ta përdorë për qëllime elektorale.
Gjithçka është zbuluar pas një kërkese të bërë nga Lëvizja Socialiste për Integrim drejtuar Bashkisë së Vlorës, për të marrë në përdorim sheshin para pallatit të sportit “Flamurtari”.
“Ai në mënyrë të palogjikshme i jep një subjekti zgjedhor për dy muaj sheshin për përdorim për fushatë elektorale, ndërkohë që fushata ende nuk ishte çelur dhe nga ana tjetër e mban peng këtë shesh, që i përket gjithë qytetarëve dhe subjekteve politike, për të zhvilluar aktivitetin deri në 30 qershor,- shkruhet në këtë letër.
Gjithashtu, ata i janë drejtuar kryeministrit Rama dhe zv.kryeministres Mandija, të marrin në konsideratë në mënyrë të menjëhershme këtë akt të paprecedentë.
Deklaratë e Këshilltarëve të LSI-së në Bashkinë Vlorë
Sot më datë 7.06.2017
U njohëm me një përgjigje të dhënë nga kryetari i Bashkisë lidhur me kërkesën për të ushtruar të drejtën që jep ligji për mbajtjen e tubimeve gjatë fushatës elektorale.
Në përgjigje të kërkesës së drejtuar zyrtarisht nga dega e LSI-së në Vlorë, Kryetari i Bashkisë jep përgjigjen më qesharake dhe absurde dhe të rrezikshme për funksionimin e procesit zgjedhor.
Ai në mënyrë të palogjikshme i jep një subjekti zgjedhor për dy muaj sheshin për përdorim për fushatë elektorale, ndërkohë që fushata ende nuk ishte çelur dhe nga ana tjetër e mban peng këtë shesh, që i përket gjithë qytetarëve dhe subjekteve politike, për të zhvilluar aktivitetin deri në 30 qershor.
Këshilltarët i drejtohen Kryeministrit të Shqipërisë z. Rama dhe Zv. kryeministres znj. Mandija të marrin në konsideratë në mënyrë të menjëhershme këtë akt të paprecedentë të një kryebashkiaku që merr peng sheshin dhe të marrin masat.
Ndërkohë, i drejtohemi Kryetarit të Bashkisë të japë menjëherë dorëheqjen sepse ka shkelur ligjin duke njohur çeljen e fushatës përpara afatit ligjor.
Pra, kryetari i bashkisë ka shpërdoruar detyrën duke shkelur ligjin. Tubimi do të mbahet në vendin ku është kërkesa dhe është e patolerueshme që ky shesh të vihet në dispozicion të një subjekti për 2 muaj, përfshirë edhe muajin e fushatës.
Ndaj ne e denoncojmë këtë akt të turpshëm.
Artimida Luçaj
Kreshnik Ziaj
Luçiana Koprencka
Bashkim Bega
Gjolek Bushi
Baki Jazaj
Andi Resuli
