Kombëtarja shqiptare e futbollit ka humbur me rezultatin 2-1 në miqësoren ndaj Luksemburgut.
Kjo ndeshje ka shërbyer si test për përballjen e së dielës kundër Izraelit, e vlefshme për kualifikueset e Kupës së Botës “Rusi 2018”.
Kombëtarja shqiptare ka kaluar e para në avantazh me golin e Odise Roshit në minutën e 52’ me një pasim të saktë të Hysajt.
Por në minutën e 63 Kukeli nuk bllokon dot një pasim për Turpelin, i cili futet me top i vetëm në zonë dhe përballë Strakoshës nuk e ka të vështirë të shënojë duke barazuar shifrat.
Në minutën e 74 Bensi ekzekuton një goditje këndi nga e majta dhe kroson në zonë, aty ku Malget kërcen mbi të gjithë dhe godet me kokë duke përmbysur shifrat në favor të Luksemburgut.
LUKSEMBURG – SHQIPËRI
Luksemburg: Shon, Mahmutoviç, Malget, Bohnert, Filips, Martins Pereira, Thill, Bensi, Rodrigez, Jans, Turpel
Trajner: Lyk Holc
Shqipëri: Strakosha, Hysaj, Gjimshiti, Mavraj, Lenjani, Kukeli, Kaçe, Abrashi, Roshi, Memushaj, Çikalleshi
Trajner: Xhani De Biazi
