Deputeti i LZHK-së, kandidati në listat e PD-së, Dashamir Shehi ka folur lidhur me qëndrimin e Jozefina Topallit dhe lëvizjet brenda PD-së nga Lulzim Basha.
Shehi u shpreh se deklaratat e bëra nga ish-kryetarja Kuvendit, po bëhen në një moment jo të përshtatshëm pasi jemi në periudhë fushate.
Po ashtu kreu i LZHK-së, tha se nuk është momenti për një zonjë serioze që merret me politikë, që ditën që shpallen zgjedhjet kërkon të shkarkohet kryetari.
“Kam shumë respekt për zonjën Topalli, por ka gjetur një moment jo shumë oportun për të filluar betejën e demokratizimit të PD-së. Mund ta kishte filluar me muaj përpara, me vite përpara”-u shpreh ai.
Më tej, ai ka shprehur mendimin e tij edhe me veprimet e kreut të PD-së, duke thënë se lista nuk është perfekte por Basha ka bërë një gjest të madh politik, një sfidë të madhe, të rinovojë PD dhe politikën shqiptare në përgjithësi.
“Unë e di që ajo listë nuk është perfekte, e di që PD nga brenda nuk është ajo katedralja e kristaltë e lirisë dhe e demokracisë, është një parti shqiptare me gjithë kusuret e saj. Do ti kujtoj një gjë shqiptarëve. Ky djaloshi i ri, Basha ka marrë një gjest të madh politik, një sfidë të madhe, të rinovojë PD dhe politikën shqiptare në përgjithësi. Ka bërë një akt që brenda mund të ketë edhe element padrejtësie, dhune politike, mund të prodhojë dhe pakënaqësi, por duan kurajo për tu bërë ca gjëra të reja. Gjithmonë jemi ankuar s’po ndodh gjë dhe ska rinovim. Ditën që e merr me kurajo njëri duke riskuar edhe karrierën e vetë, edhe emrin e vetë, e ka bërë si sfidë personale, i turren. Koha do ta tregojë, këto ditë që janë të fushatës, rezultati zgjedhor, nëse ka bërë një veprim të mirë apo të keq”, tha Shehi në emisionin “Kapital”.
