Sot është 1 Qershor, Dita Ndërkombëtarë e Fëmijëve. Kjo është një ditë festive, por edhe një ditë sensibilizimi, për t’i thënë jo dhunës dhe abuzimit ndaj fëmijëve.
Është dita kur vetë fëmijët ngrenë zërin për të drejtat e tyre, por në ndryshim nga të rriturit, protesta e tyre bëhet me lojra festive.
Bashkia e Tiranës pritet të organizojë sot një sërë aktivitetesh festive dhe argëtuese për fëmijët e kryeqytetit. Edhe fëmijët e shkollave, kopshteve e cerdheve në mbarë vendin festojnë sot ditën e tyre.
Dita e fëmijëve u vendos në datën 1 qershor, sepse në këtë datë është mbajtur Konferenca Botërore e Mirëqënies së Fëmijëve në Gjenevë, në 1925. Në të njëjtën ditë, koinçidoi që konsulli i përgjithshëm kinez në San Francisko mblodhi së bashku një numër të konsiderueshëm fëmijësh jetim kinezë, të celebronin në festivalin e “Anijes së Dragoit”. Dy vjet më pas Festa e 1 Qershorit filloi të festohet në të gjithë botën.
