Festivali i muzikës klasike, “Flauti Magjik”, i kthyer tashmë në traditë, vjen edhe këtë vit me 5 netë muzikë dhe risi.
Mbrëmja e parë e tij këtë vit erdhi në skenën e Universitetit të Arteve pikërisht me “Flautin magjik” të Mozartit.
Ky festival i shndërruar tashmë në traditë, ka përcjellë për publikun një krijimtari të pasur muzikore. Drejtori artistik i festivalit Fatos Qerimaj e ka konceptuar edicionin e pestë të këtij festivali si një kombinimi midis muzikës xhaz dhe asaj klasike.
Këtë herë përveçse krijimtarisë muzikore në skenë do të jetë edhe aktori i njohur Dritan Boriçi i cili do të trajtojë fabulën e Moxartit me një koncept narrativ.
Ndër pesë mbrëmjet artistike të festivalit, sipas drejtorit artistik Fatos Qerimaj, treprej tyre do të trajtohen me këtë stil.
“Më datë 2 qershor do jemi pranë detit, me 3 qershor buzë liqenit të Farkës dhe më 7 qershor në RTSH. Repertori i zgjedhur nga Mozart në festival do të vijojë deri tek muzika bashkëkohore, duke trajtuar dhe prekur shumë linja të artit”, thotë Qerimaj.
Gjatë katër viteve më parë artistët shqiptarë si dhe ata të huaj nga Franca, Austria, USA, Zvicra, Kroacia, etj, ofruan një program dhe model bashkëpunues të larmishëm, duke e bërë skenën e festivalit një laborator muzikor plot alternativa dhe ngjarje risi.
