Kryeministri Edi Rama, u prezantua në darkën informale me zyrtaren e lartë të BE-së, më shumë se informal, sa i përket stilit të veshjes.
Krejtësisht ndryshe nga pesë homologët e tij të Ballkanit Perëndimor, që ishin pjesë e këtij takimi me Mogherinin, Rama mbante veshur një bluzë të stampuar me pamjen e New Yorkut, pantallona të gjera që më shumë ngjanin me tuta, atlete dhe xhaketë, një kombinim abstrakt që në fakt është në stilin dhe natyrën e tij.
Nuk dihet nëse Rama ka patur për qëllim që me këtë stil veshjeje të respektojë natyrën joformale të darkës, apo t’i tregojë Mogherinit se po vjen direkt nga fushata (një takim elektoral në Kashar), ku i është shtruar punës për të mbajtur timonin e qeverisë shqiptare, tashmë të mirëorientuar drejt BE-së.
Gjithsesi mbetet me rëndësi fakti që Kryeministri shqiptar bënte dukshëm diferencën në këtë takim. Veshja e kryeqeveritarit ka ngjallur jo pak debat dhe reagime në rrjetet sociale me mbështetës dhe kritikë të fortë.
Madje edhe vëmendja rreth takimit dhe asaj çfarë mund të jetë diskutuar aty, është zhvendosur tërësisht tek prezantimi i Ramës me këtë stil veshjeje, i cili mund të kthehet në një trend edhe për nivelet zyrtare. /Tirana Today/
