“Edi Rama mendon se, meqë i gënjeu njerëzit njëherë, mund t’i gënjejë përsëri”, ka qenë ky reagimi i kreut të Partisë Demokratike Lulzim Basha pas replikave të fundit nga distanca midis tij dhe kryeministrit Rama.
Basha me anë të një statusi në “Facebook” ka sulmuar Kryeministrin lidhur me premtimet e pambajtura gjatë katërvjeëarit të parë dhe rinisjen e tyre nga e para për katër vjeçarin e ardhshëm.
Sipas Bashës, Edi Rama kujton se njerëzit nuk kuptojnë, prandaj i gënjen, i përçmon dhe i tall çdo ditë ata, dhe nga ana tjetër, ai shprehet se Republika e Re do ti nxjerrë qytetarët nga mjerimi.
Kujtojmë se pas marrëveshjes PD-PS lidhur me datën e zgjedhjeve dhe votimin e disa nga pikat me të rëndësishmes si Vettingu etj., duket se dy krerët e partive kanë nisur sulmin ndaj njëri-tjetrit për të rritur elektoratin e partive që drejtojnë.
Statusi
Edi Rama mendon se, meqë i gënjeu njerëzit njëherë, mund t’i gënjejë përsëri. Pasi nuk mbajti asnjë premtim, qoftë edhe një të vetëm, ai ka filluar të premtojë nga e para.
Premtoi 300 mijë vende pune, por nuk hapi asnjë. 300 mijë shqiptarë e braktisën Shqipërinë katër vitet e fundit për të gjetur punë në emigrim, por në vend të kërkojë falje, ai po gënjen prapë se do të hapë 220 mijë vende në mandatin e dytë. Në katër vite, të varfërit u varfëruan më shumë, ndërsa një grusht oligarkësh u bënë më të pasur nga favoret e qeverisë, por ai prapë gënjen kur thotë se do të punojë për të varfërit. Shëndetësia e premtuar falas është rrënuar dhe njerëzit paguajnë çdo gjë nga xhepi i tyre, por ai gënjen edhe një herë duke premtuar se do e bëjë falas në mandatin e dytë. Ai i braktisi fermerët e nuk u dha kurrë mbështetje, por ai tani premton se me të do të lulëzojë bujqësia. Krimi zaptoi shtetin e ekonominë dhe kanabisi mbuloi Shqipërinë, por ai thotë se ka bërë shtet dhe do bëjë edhe më shumë shtet.
Edi Rama kujton se njerëzit nuk kuptojnë, prandaj i gënjen, i përçmon dhe i tall çdo ditë ata. Shpërfillja ndaj qytetarëve dhe përqëndrimi i pushtetit e pasurisë në pak duar është vete thelbi i republikës së vjetër. Ndryshimi më i madh që do sjellë Republika e Re është kthimi i pushtetit tek njerëzit, të cilët do të kenë mundësi të jetojnë në mënyrë të ndershme, me punën dhe aftësitë e tyre.
