Në rast se Prishtina përsërit kërkesën për pranim në UNESCO, Serbia është e gatshme për një luftë diplomatike për të ndaluar këtë veprim.
Qëndrimi i Serbisë u konfirmua nga ambasadori i saj në UNESCO, Darko Tanashkoviq, në një intervistë për gazetën “Jedinstvo” që botohet në Kosovë, transmeton Klan Kosova.
Ai tha se parakusht për sukses në këtë drejtim, është që të veprohet si në fazën përfundimtare të fushatës së vitit 2015, ku u bashkuan dhe koordinuan të gjitha institucionet shtetërore.
Shumica e vendimeve të Bordit Ekzekutiv të UNESCO-s, përfshirë edhe rekomandimet për anëtarësim, kërkojnë vetëm një shumicë të thjeshtë votash. Deklaratat e Serbisë kanë të bëjnë kryesisht me kundërshtimin e saj rreth avancimit ndërkombëtar të shtetësisë së Kosovës e shumë më pak rreth ndryshimit të statusit ‘të pronësisë’ së objekteve bizantino-ortodokse që tashmë janë të përcaktuara si trashëgimi botërore dhe me status nën mbrojtje të UNESCO-s, e që janë në territorin e shtetit të Kosovës.
