Lojtari i Skënderbeut, Tefik Osmani e ka cilësuar të turpshme ndeshjen e djeshme me Kukësin. Mbrojtësi i Skënderbeut, të cilit iu mohua një penallti, kontestoi ashpër gjyqtarin Enea Jorgji dhe ky i fundit i tregoi menjëherë kartonin e kuq, karton i cili u gris nga Hamdi Salihi në shenjë proteste.
Kjo ia bëri më të lehtë skuadrës së Kukësit e cila arriti të shpallet kampion i Superligës shqiptare mes polemikave të shumta për favorizim dhe manipulim të rezultateve.
“Është e pabesueshme! E pa e gjithë Shqipëria se çfarë ndodhi në Kukës. Është një turp, nuk di çfarë emri t’i vendos tjetër. Personalisht i kërkoj falje tifozerisë korçare, shokëve të skuadrës, stafit dhe drejtuesve, pasi lashë skuadrën me dy lojtarë më pak. Nuk di çfarë të them më tepër, jam i shokuar nga ajo që ka ndodhur”, ka thënë i dëshpëruar titullari i Skënderbeut për Panorama Sport.
