Një ekzekutimi mafioz ka ndodhur pasditen e sotme në fshatin Rukaj të rrethit të Matit.
Sipas të dhënave të para të policisë mësohet se në sallën operative të Komisariatit të Policisë Mat, ka telefonuar një djalë dhe ka thënë se: “Në fshatin Rukaj, persona të pa njohur me një automjet, më kanë vrarë babain”.
Menjëherë janë nisur forca të shumta policie në drejtim të fshatit Rukaj, për verifikimin e telefonatës ku ka rezultuar se persona të panjohur duke përfituar edhe nga errësira, në oborr të banesës kanë vrarë me armë zjarri shtetasin H.Ll, rreth 60 vjeç dhe janë larguar me shpejtësi me një automjet ende të paidentifikuar.
Sipas informacioneve të para thuhet se tre vite më parë i kanë vrarë edhe të vëllanë, shtetasin Xhavit Lleshi.
Thuhet se ngjarja ka motive hakmarrje për një vrasje të ndodhur vite më parë në Angli.
Xhavit Lleshin, e kanë ekzekutuar në fshatin Pujt të Matit po me breshëri automatiku.
Nga ana e Policisë janë ngritur pika të shumta kontrolli dhe po krehet zona për identifikimin dhe kapjen e autorëve të implikuar në këtë ngjarje.
Gjithashtu, bëhet me dije se 60 vjeçari i kishte shpëtuar edhe dy herë të tjera pritave që i ishin ngritur.
