Në Bienalen e Venecias morën pjesë artistë të ndryshëm nga Shqipëria dhe Kosova ku e pranishme ishte dhe ministrja e Kulturës Mirela Kumbaro. Ajo flet me superlativa për artistët tanë dhe u jep atyre vlerat e merituara që i takojnë.
Fjala e Kumbaros
“Më të mirët e Kosovës e të Shqipërisë që i japin asaj atë që politika tradicionale s’e bën dot. Petrit Halilaj nga Kosova merr Çmimin Special në Bienalen e Venecias.
Leonard Qylafi përfaqëson denjësisht Shqipërinë në pavijonin kombëtar në Bienale.
Sislej Xhafa tregon dhimbjen e Kujtesës me forcën e artit në Skenën ndërkombëtare me të madhe të Artit. Driant Zeneli me shokë mblodhën 250 artistë në Tiranë duke e kthyer Shqipërinë ne skenën e madhe të Mesdheut. Jam e bindur në rolin emancipues të artit e të kulturës në shoqëri siç nuk vë në dyshim shërbimin e jashtëzakonshëm që i bën kultura vendit në forcimin e pozicionit të vet në skenën ndërkombëtare.
Shqipëria dhe Kosova kartëvizitën më të mirë kanë artin dhe kulturën, kalorësit më të fortë kanë artistët, gratë e burrat e kulturës dhe lajmet më të mira i kanë prodhuar me art e kulturë
Sot, aty ku është dritëshkurtër politika rri në çadra, fshihet pas gishtit, punon kundër progresit, madje prodhon antikulturë. Për fat të mirë Kultura ecën para dhe na jep shpresë e dritë se do ndryshojë politikën dhe do emancipoje shoqërinë”, thotë Kumbaro.
