Instituti i Shëndetit Publik ka realizuar një studim për përdorimin e lëndëve narkotike tek adoleshentët, kryesisht frekuentues të gjimnazeve.
Studimi ka dalë me shifra të frikshme, ku numri i përdoruesve ka ardhur në rritje ndërsa shkak për këtë është gjetja me lehtësi e lëndës narkotike.
Sipas studimit nxënësit me mesatare të dobët dhe ata me prindër të ndarë janë kategoria që konsumojnë më shumë hashash.
Numri i adoleshentëve të cilët konsumojnë hashash është rritur ndjeshëm viteve të fundit. Sipas studimit të prezantuar në konferencën vjetore të ISHP, përdorimi i lëndëve narkotike ndikon edhe në rezultatet e mësimeve të të rinjve.
Nga 197 klasa të 9-ta dhe të 10-ta që janë anketuar rezulton se nxënësit me mesataren mbi 8, nuk janë përdorues të lëndëve narkotike ose janë në një numër të ulët.
Teksa për ata që janë me mesatare më të ulët, numri i përdoruesve është 40 për qind më i lartë.
Një tjetër faktor që sipas ISHP ndikon në përdorimin e substancave narkotike është edhe struktura familjare, ku sipas të dhënave adoleshentët që jetojnë me prindër të divorcuar apo vetëm njërin nga prindërit janë përdorues në masë të hashashit.
Në këtë rast nxënësit përdorues të kanabisit janë 8.2 për qind më shumë. Përdoruesit e kanabisit sipas studimit:
-8.2 % e nxënësve me prindër të divorcuar
-5.3 % e nxënësve që kanë dy prindërit
-40 % e nxënësve me mesatare të ulët
-4.4 % e nxënësve me mesatare të lartë
