Ministria e Energjisë dhe Industrisë ka hapur garën për dy koncesione të reja hidrocentralesh. Bëhet fjalë për “Bushtrica 1” dhe “Bushtrica 2”, të cilët do të kenë një afat 35 vjet.
Hidrocentrali i parë do të jetë në segmentin e pellgut ujor të lumit të Bushtricës, nga kuota 380 metra mbi nivelin e detit deri në kuotën 498 metra mbi nivelin e detit.
Kurse hidrocentrali i dytë do të jetë në kuotën nga 503 metra mbi nivelin e detit deri në kuotën 678 metra mbi nivelin e detit, shkruan “Scan TV”.
Për të dy koncesionet nga ana e ministrisë nuk është vendosur një vlerë, ndërkohë që janë përcaktuar kriteret të cilat do të merren parasysh për shpalljen e kompanisë fituese, ku pjesën kryesore e zë fuqia e instaluar.
Ofertat duhet të paraqiten jo më vonë se data 31 maj 2017, në Ministrinë e Energjisë dhe Industrisë. Dy koncesionet e nxjerra në garë nuk janë të padëgjuara për publikun.
Në vitin 2007, qeveria Berisha miratoi një bonus prej 9.5 për qind të pikëve për propozimin e pakërkuar nga kompania “2A Power sh.p.k”.
Por, që nga ajo kohë këtë procedurë e kanë përndjekur problematikat dhe vetëm tani u hap sërish gara për të lidhur një kontratë të re.
