Zbardhen propozimet për negociata të eurodeputëtëve me krerët e politikës shqiptare. Zyrat e Bashkimit Europian ka thënë në një njoftim për shtyp se eurodeputetët Knut Fleckenstein dhe David McAllister kanë patur një “diskutim të mirë” me opozitën dhe mazhorancën shqiptare.
Ndërkohë, bie në sy kërkesa e Bashës për “kryeministër teknik”, gjë që nuk është pranuar nga palët tjera.
David McAllister dhe Knut Fleckenstein kërkuan që të bëhen ndryshime në 4 ministri, ndryshime këto që mund t’i përcaktonte vetë PD, duke emëruar persona teknikë dhe jopolitikë, por do të emëroheshin prej Kryeministrit.
Por, kreu i PD-së ka shkuar më tej, pasi ka kërkuar që edhe kryeministri të ishte teknik, propozim ky që hasi në kundërshtimin e shefit të qeverisë.
Kjo ka qenë kërkesa e vetme që ka sjellë dështimin e negociatave, të cilat zgjatën më shumë se 5 orë.
Bashës, po ashtu, iu propozua edhe kreu i KQZ-së, Avokati i Popullit, disa drejtori të policisë në qarqe që do të ofronin siguri në zgjedhjet e përgjithshme, si dhe të drejtën e presidentit konsensual. Por, Basha i qëndroi kërkesës për kryeministër teknik dhe sistem elektronik për zgjedhje, gjë që ka sjellë dështimin e negociatave.
