Një i ri është privuar nga ëndrra e tij për t’u bërë polic, për shkak të një tatuazhi që kishte bërë në dorë, pas ndarjes së nënës së tij nga jeta.
Rastin e bëri publik kreu i LIBRA-s, Ben Blushi, gjatë një seance parlamentare.
I riu me iniciale G.R. tregon në një intervistë për dritare.net se si një tatuazh po e mban larg ëndrrës së tij për t’u bërë polic.
“Mamaja më ka vdekur para tre vitesh dhe këtë tatuazh e bëra direkt. Nuk them që jam penduar që e bëra, por për shkak të punës, që ëndërroja të kisha, mendova se nuk kishte asnjë problem për ta hequr. Ndërkohë, tatuazhin me portretin e mamit e kam në gjoks dhe atë nuk e heq për asnjë gjë në botë. Edhe pse, vendi ku e kam bërë nuk sjell problem për në punë”, thotë i riu.
Pasi mori vesh se për të qenë polic, nuk duhej të kishe shenja identifikuese apo tatuazhe, 23-vjeçari vendosi që ta hiqte dedikimin në dorë me anë të një operacioni plastik, por përsëri mundi i shkoi kot:
“Unë i kalova të treja fazat e konkurrimit, kalova me sukses provimin e teorisë, testin fizikë dhe atë psikologjik. Në raundin e parë fituan më shumë se 60 persona, sipas pikëve të grumbulluara i ndanë në dy grupe. Unë nuk isha te grupi i parë, por isha tek ai i dyti, quhesha fitues në pritje.
Gjatë kësaj kohe më thanë se nuk lejoheshin tatuazhet në vende të dukshme dhe një miku im më tha që nëse do bëja një tentativë për ta hequr mund të kishte ndonjë tolerim. Dhe unë kështu bëra, vendosa të bëja një operacion plastik për të hequr tatuazhin që kisha në dorë. Nuk e bëra më lazer pasi kisha frikë pasojat në lëkurë, gjithashtu, edhe koha për të bërë seancat ishte e pamjaftueshme.
Pas kësaj, më thirrën në telefon për të hyrë në komision për të bërë vlerësimin mjekësor dhe atë fizik. Atje shkova me çdo dokumentacion që mora nga doktori, por personat që ishin në komision më thanë se shenja e operimit ishte problem.
Aty mendova se kjo ishte gjë e drejtë, më skualifikuan për tatuazhin e shenjën, pasi kështu është për të gjithë.
Por, më pas kam parë që në shkollën e policisë kanë hyrë shumë të rinj e të reja me tatuazhe, të cilët i shohim edhe në rrugë, kjo më bëri të kuptoj se ajo që më ndodhi mua ishte një padrejtësi. Si janë futur të tjerët është punë për ta, unë as nuk dua të merrem me këtë pjesë. Mua më intereson çfarë do të bëhet me mua, unë kam besim te vetja dhe e di që jam shumë i mirë për atë punë.”
I riu thotë se nuk do të heqë dorë nga ëndrra e tij për t’u bërë polic, ndërsa shton se ka zgjedhur Shqipërinë, pavarësisht se ka letra greke dhe mund të jetojë diku tjetër.
“Do të vazhdoj të luftoj për të qenë në shkollën e policisë, duke mos lejuar një tatuazh të më pengojë. Ndaj nuk dua të them emrin në këtë intervistë, që të mos paragjykohem, kur të shkoj sërish në konkurs. Sepse prapë do të shkoj. Unë jam i ri dhe si të gjithë në moshën time, kërkoj të ndërtoj një jetë të sigurt. Dua që jetën ta kem këtu në Shqipëri, edhe pse kam letra greke dhe mund të shkoj të jetoj në shumë vende, përsëri zgjedh vendin tim”, thotë 23-vjeçari.
