Pas përfundimit të protestës së opozitës, ka reaguar, për herë të parë, Policia e Shtetit. Kjo e fundit ka njoftuar se do të nisë ndjekjen penale për organizatorët e këtij tubimi.
Gjithashtu, Policia e Shtetit thotë se tubimi ishte i paligjshëm, pasi opozita nuk kishte leje për bllokimin e akseve kryesore kombëtare.
Ndër të tjera, në njoftim thuhet:
“Për rreth 1 orë, tre pika kyçe në akset kryesore kombëtare rrugore dhe 2 nyje lidhëse në Tiranë, u bllokuan nga një protestë e subjektit politik Partia Demokratike, megjithëse Policia e Shtetit, në zbatim të kërkesave të ligjit, nuk miratoi lejen për mbajtjen e këtyre tubimeve.
Protesta e sotme e opozitës u organizua kryesisht nga deputetë dhe funksionarë të Partisë Demokratike në kundërshtim me ligjin nr. 8773, datë 23.04.2001 “Për tubimet”, edhe pse u lajmëruan me shkresë dhe publikisht nga autoritetet ligjore përkatëse.
Përgjatë zhvillimit të tubimeve janë dokumentuar shkeljet e ligjit dhe përgjegjësitë e organizatorëve, konkretisht shkelje konform nenit 262 të Kodit Penal ‘Organizimi dhe pjesëmarrja në grumbullime e manifestime të paligjshme’ si dhe nenit 293 të Kodit Penal ‘Pengimi i qarkullimit të mjeteve të transportit’.
Për këtë arsye, Policia po punon për kryerjen e veprimeve të mëtejshme proceduriale, këto veprime do t’u paraqiten Prokurorive të rretheve gjyqësore përkatëse për ndjekje penale.
Në bazë e në zbatim të ligjit, strukturat e Policisë pas fiksimit dhe mbikqyrjes profesionale të protestave të paligjshme, kanë përpiluar materialet proceduriale, për organizatoret dhe shkelësit e ligjit dhe materialet do të referohen për fillimin e çështjes penale në Prokuroritë e rretheve gjyqësore, respektive, Tiranë, Kurbin, Elbasan e Lushnjë.
