Data 22 prill, njihet në gjithë botën si Dita Ndërkombëtare e Tokës. Kjo është një ditë që shërben për të dhënë alarmin për dëmet që njerëzimi i shkakton pyjeve, lumenjve, tokës dhe pasurive të tjera të natyrës dhe të reflektojë e sensibilizohet për të ndalur shkatërrimin e mëtejshëm të saj.
Në këtë ditë edhe ne shqiptarët duhet të ndërgjegjësohemi për të mbrojtur sa më shumë mjedisin në të cilin jetojmë, megjithëse për çerek shekulli e kemi shkatërruar pa fund. Uroj që ditë të tilla të na ndërgjegjësojnë ta duam më shumë vendin tonë dhe planetin në të cilin jetojmë.
Ideja për Ditën e Tokës është zhvilluar që nga viti 1962. Senatori Gaylord Nelson, pas shumë përpjekjeve dhe takimeve, arriti që idenë për Ditën e Tokës, si çështje mjedisore, ta fusë në programin politik.
Më 22 Prill 1970, në SHBA u mbajt një manifestim i madh mjedisor, i pari i këtij lloji, prej nga edhe doli ideja për shpalljen e kësaj date si Dita e Planetit Tokë. Qëllimi i kësaj date mbetet mbrojtja e planetit Tokë dhe të gjitha resurseve të saj nga ndotja.
Dita e planetit Tokë është një lëvizje, e cila angazhohet për përfshirjen e të gjithëve në mbrojtje të Tokës.
Më 22 prill, në mbarë botën, dashamirëse të mjedisit organizohen një varg aktivitetesh për të mirën e mjedisit dhe të njeriut, si: aktivitete pastrimi, gjelbërimi, pyllëzimi, manifestime në formë protestash, ekspozita, koncerte, vizita, peticione, orë edukative me nxënës, konferenca shkencore lidhur me problemet mjedisore etj.
