Bashkia e Tiranës ka nisur ndërtimin e rrugës “Faik Konica”, në Njësinë nr. 2, duke futur një koncept të ri në infrastrukturë: në vend të shtrimit me asfalt, do të përdoret kalldrëmi.
Gjatë inspektimit të punimeve, kryebashkiaku Erion Veliaj tha se investimi do të lehtësojë qarkullimin e automjeteve në këtë zonë, duke përmirësuar edhe komunikimin mes disa rrugëve.
Kreu i Bashkisë garantoi se një kujdes i veçantë i është kushtuar edhe gjelbërimit, e ndërkaq është parashikuar mbjellja e 180 fidanëve të rinj, bliri dhe pishe. “Do të mbjellim 180 pemë të reja bli dhe pisha përgjatë gjithë korsisë së rrugës, për t’u siguruar që një pemë e sëmurë zëvendësohet me 60 pemë të shëndosha”, shtoi ai.
Ndërtimi i plotë i rrugës “Faik Konica” parashikon ndërhyrje në gjithë nënshtresat dhe shtresat sipërfaqësore, ndërtimin e kanaleve të ujërave të zeza, të ujërave të bardha, ndërtimin e linjave rezervë për fibrat optike, si dhe ndriçimin e rrugës. Gjerësia e rrugës do të jetë 11.5 metër, ku një korsi do të shërbejë për qarkullimin e automjeteve dhe një për parkimin, ndërsa do të ketë edhe një korsi të dedikuar për biçikletat.
