Aleksandër Vuçiç ka reaguar pak ditë pas deklaratës së bujshme të kryeministri Rama për bashkim me Kosovën, nëse BE i mbyll dyert e anëtarësimit.
Kryeministri serb u ka bërë thirrje politikanëve shqiptarë, që të mos bëjnë thirrje për bashkim, sepse deklarata të tilla nuk u kontribuojnë marrëdhënieve të mira në rajon.
“Ne i lusim, po e përsëris, i lusim që me deklarata të tilla të mos dalin në publik, sepse ato nuk u kontribuojnë marrëdhënieve të mira në rajon dhe as krijimit të atmosferës së bashkëpunimit dhe punës së përbashkët në projekte të rëndësishme”, tha Vuçiç në konferencën për gazetarë në Qeverinë e Serbisë, transmeton Shërbimi i Ballkanit i Radios Evropa e Lirë.
Deklarata e bujshme e Ramës pasoi me një tjetër deklaratë të fortë të Hashim Thaçit, i cili rikonfirmoi të njëjtin qëndrim si kryeministri shqiptar.
“Nëse Bashkimi Evropian e mbyll derën për Kosovën, atëherë të gjithë shqiptarët në rajon do të jetojnë në një hapësirë të vetme”, tha Thaçi.
