Kryeministri i Kosovës, Isa Mustafa, ka njoftuar se është caktuar një ekip ndërministror, i cili do të bëjë identifikimin e nevojave shtetërore për blerjen e helikopterëve.
Në takimin që pati Mustafa me disa ministra u vendos, që këta helikopterë të blihen nga kompanitë më prestigjioze në botë.
Ky lajm nuk iu ka shpëtuar mediave serbe, të cilat sot gjatë gjithë ditës kanë raportuar se shteti i Kosovës shumë shpejt do të bëhet me helikopterë.
Agjencia e lajmeve Tanjug, gjatë ditës ka cituar Mustafën, duke thënë se helikopterët do t’i nevojiten Kosovës për raste emergjente.
