Pas miratimit nga Kuvendi të komisionit ad-hoc të Vettingut, prej 12 anëtarësh, që do të bëjë rivlerësimin e gjyqtarëve dhe prokurorëve, Edi Rama shpjegoi edhe arsyet e bojkotit të opozitës në këtë proces. Sipas tij, Partia Demokratike i druhet reformës në drejtësi, prandaj është vendosur në çadër. E gjitha kjo, sipas Ramës, rrezikohet të kthehet në një turp kombëtar, pasi pengon integrimin e vendit në Bashkimin Evropian.
“Ata që janë ngujuar në çadër i druhen drejtësisë. Kjo është një njollë e zezë turpi. Partia që lindi si thirrje “E duam Shqipërinë si gjithë Evropa”, po i vë një njollë të madhe vendit. Moskryerja e vettingut pengon procesin e integrimin në Bashkimin Evropian. PD është gati ta ndajë edhe një herë për së gjalli Shqipërinë nga Evropa, vetëm për t’iu shmangur ballafaqimit me drejtësinë, të atyre që kanë kusure për të larë në një shtet të së drejtës. Ne vazhduam të çojmë përpara një proces që nuk ndalon dot më. Vendosja e drejtësisë në funksion të qytetarëve nuk ndalet dot.”
Ai shtoi se zgjidhja e krizës politike me opozitën mund të vijë përmes ndërhyrjes së Partive Popullore Evropiane. “Do të përpiqemi të gjejmë një zgjidhje dhe të gjejmë një dialog, të cilin, frika e madhe e mishëruar tek Basha e ka bërë të pamundur. Kemi vendosur t’i drejtohemi PPE-së për të lehtësuar komunikimin me PD-në, është dëgjuar pozitivisht”
