Më 24 prill të këtij muaji në Vlorë është paralajmëruar se do të zhvillohet mbledhja e përbashkët e qeverisë së Shqipërisë dhe qeverisë së Kosovës.
Profesor i ekonomisë në Luginën e Preshevës, Refik Hasani ka shprehur bindjen se ky takim i dy qeverive ishte e udhës të prodhojë miratimin e një deklarate të përbashkët të dy qeverive, lidhur me qëndrimin ndaj diskriminimit të shqiptarëve në Medvegjë, Preshevë dhe Bujanoc.
“Nuk duhet të mjaftohet vetëm të japë një mesazh të mbështetjes morale për Medvegjë, Preshevë e Bujanoc, por edhe të njoftojë, alarmojë dhe sensibilizojë opinionin mbi diskriminimin, por mbi të gjitha të ndajë mjete dhe të krijojë një fond të përhershëm. Të ndahen detyra e përgjegjësi saktë, të dihet për çdo vjet nga sa mjete do të ndahen, jo vetëm premtime në letër. Dy qeveritë shqiptare kanë obligim moral, institucional dhe kombëtar, që më në fund në këtë takim të radhës të dy qeverive, të fillojë një qasje e re, e mirëfilltë, reale, të gjithë bartësit e institucioneve të dy shteteve të bashkërendojnë qëndrimet zyrtare, të harmonizojnë strategjitë e veprimi si: Për Referendumin e 2 marsit 1992, për Marrëveshjen e Konçulit, Këshillin Nacional të Shqiptarëve, Trupin Koordinues, për diskriminimin në këtë Krahinë, për amnistinë e ushtarëve të UÇPMB-ës, për të dëbuarit, zhvendosurit etj.”, ka thënë Hasani.
