Maturantët, që fitojnë të drejtën e studimit në një degë, kanë mundësi të çregjistrohen, nëse më vonë rezultojnë fitues në një program studimi që e preferojnë më shumë.
Kjo është risia që parashikon udhëzimi për procedurat e aplikimit dhe pranimit në institucionin e arsimit të lartë, ndërsa mësohet se do të ketë dy raunde pranimi të mirëfillta, por më të strukturuara dhe jo me nënfaza të pafundme, deri në plotësimin e kuotave të secilit program studimi, siç ndodhi vjet.
Udhëzimi i MAS është gati dhe do të publikohet në muajin maj.
Sipas skemës së re të pranimeve, asnjë maturant fitues nuk do të mbetet peng i zgjedhjes së parë, vetëm nga frika se mund të mbetet pa fakultet. Në fund të procesit, ai do të ketë një ditë kohë në dispozicion të mendohet dhe të mund të kthejë mbrapsht veprimin e tij, në rast se e gjykon të arsyeshme, shkruan Panorama.
Aplikimi dhe regjistrimi i kandidatëve fitues do të kryhet me anë të dy portaleve: atë të maturantit dhe ai qeveritar, ualbania.
