Monika Kryemadhi ka lëshuar një akuzë të rëndë ndaj kryeministrit Rama, ndërsa ka bërë thirrje që të gjendet zgjidhja e ngërçit mes tij dhe Bashës.
Sipas Kryemadhit, konfliktet politike po largojnë investitorët e huaj, pasi këta të fundit i frikësohen kaosit dhe krizës politike.
“Jemi të shqetësuar nga konflikti politik dhe impakti i drejtpërdrejtë që ka te njerëzit. Sa herë që Rama sulmon Bashën, 10 vende pune që do të hapeshin në Shqipëri ikin diku tjetër.
Gjithashtu, çdo sulm i Bashës drejtuar Ramës, është i barabartë me 10 vende pune më pak. Çdo ditë që ka konflikt politik është baraz me 100 vende pune më pak, sepse investitorët që duan të vijnë e te investojnë në Shqipëri i frikëson kaosi, kriza, konflikti politik.
Ndërkohë që jam shumë e shqetësuar për demokracinë e Shqipërisë, më shumë se kurrë jam e shqetësuar për impaktin e konfliktit politik në jetët e familjeve shqiptare dhe lidhja direkte e tij me mbylljen e vendeve të punës dhe humbjen e mundësive për të hapur vende të reja pune”, tha Kryemadhi.
