Edi Rama po mban një konferencë për shtyp, ku i bën thirrje Lulzim Bashës për dialog.
“Po pres, ka filluar të na qeshë bota”, thotë kryeministri ndër të tjera, duke e ftuar publikisht Bashën për të mirën e vendit dhe shqiptarëve.
I pyetur nga gazetarët, Rama tha se nuk ka asnjë skenar për ekzekutimin e liderit të opozitës. Sipas tij, ka pasur një informacion, por pas hetimeve, ai ka rezultuar fals. “Ai do të jetë i mbrojtur deri në fund”, tha Rama, nëse do të ketë një skenar të mundshëm.
Ndër të tjera, Rama tha gjatë fjalës së tij:
“E kam mobilizuar zyrën time për të kontaktuar me kreun e PD-së papushim. Por, mesa duket, nisma vullnetmirë e Presidentit nuk po sjell asnjë sukses për ta bindur Bashën, për asnjë tryezë. Jam i trishtuar për gjithçka që më dëgjojnë veshët. Kjo po pengon vettingun dhe po bllokon integrimin e Shqipërisë në BE.
Kjo krizë artificiale krijon një perceptim negativ për Shqipërinë, dekurajon miqtë dhe partnerët, që duan të na ndihmojnë, për integrimin në BE.
Po krijon shtigje për një destabilizim të mundshëm. Pavarësisht bindjes sime për të mos toleruar asnjë kthim mbrapa dhe për mbylljen e këtyre shtigjeve, nuk lejoj që fati i Shqipërisë të merret peng, prandaj dialogu mbetet një domosdoshmëri.
I bëj thirrje arsyes së Bashës, mos ki frikë. Mos ec qorrazi, duke sulmuar miqtë dhe partnerët me gjuhën vulgare, mos e pengo luftën tonë të përbashkët të këtij populli, me luftën tënde për pushtet. Propozoj një rrugë dialogu që ty të duket më e lehtë.
Cakto vendin ku të duash, cakto orën kur të duash, vetëm na lajmëro. Vetëm mos u vono, sepse fati yt politik mua nuk më intereson fare.
Ty dhe mua duhet të na interesojë siguria dhe qetësia e njerëzve të këtij vendi, që janë njerëz dhe mbi të gjitha meritojnë njerzillëk.
Duhet të na interesojë imazhi dhe stabiliteti i Shqipërisë, duhet të na interesojë Shqipëria, pastaj partia.
Ti e ke numrin tim të telefonit, ndaje mendjen dhe më njofto një orë e më parë, për të mirën e të gjithëve.
Harroje të ma marrësh pushtetin. Këtë qeveri nuk ke për ta rrëzuar kurrë, nëse populli nuk do ta rrëzojë më 18 qershor.”
