Sulmi me kamion, i ndodhur të premten e shkuar në Stokholm të Suedisë, e ka tashmë një përgjegjës. Rakhmat Akilov, 39-vjeçari i dyshuar nga Uzbekistani, ka pranuar përgjegjësinë e aktit të kryer, gjatë një seance dëgjimore në paraburgim. Avokatët e tij thonë se klienti i tyre e rrëfeu krimin terrorist.
Katër persona mbetën të vdekur, kur kamioni i vjedhur u drejtua përballë turmës së njerëzve në një zonë tregtare, e më pas u përplas me një prej dyqaneve, ndërsa shumë të tjerë u plagosën, dy prej të cilëve në gjendje kritike për jetën.
“Ai ka pranuar krimin terrorist të bërë dhe pranon të burgoset për aktin e kryer”, tha avokati Johan Eriksson. I dyshuari Akilov u soll në gjykatë me pranga në duar, ndërsa masat e sigurisë ishin të larta, sikurse edhe prania e medieve, pavarësisht se seanca gjyqësore u zhvillua me dyer të mbyllura.
Policia suedeze ka thënë se Akilov ishte i njohur për shërbimet e sigurisë. Atij i ishte refuzuar kërkesa për azil dhe nënshtetësia suedeze, ndërkohë që kishte shprehur simpatinë e tij për grupin xhihadist, Shteti Islamik. Ai u arratis nga vendngjarja pas sulmit, edhe pse ishte i mbuluar në gjak dhe me cifla xhami, ndërsa u arrestua disa orë më vonë, në periferinë veriore të Stokholmit.
Ai thuhet të ketë lënë bashkëshorten dhe 4 fëmijë, në Uzbekistan, me synimin për të emigruar dhe fituar më shumë parà për familjen e tij. Pasi aplikoi për nënshtetësi në vitin 2014, ai u njoftua në dhjetor të vitit të kaluar se “duhej të largohej nga vendi brenda 4 javësh”, tha zyrtari i policisë, Jonas Hysing.
Ai humbi më pas gjurmët dhe në muajin shkurt u vendos zyrtarisht në listën e të kërkuarve. Pas sulmit, ministri suedez i Drejtësisë, Morgan Johansson tha për agjencinë e lajmeve AFP, se do të kërkonte forcimin e ligjeve antiterrorizëm në vend.
