Një shpërthim i fuqishëm ka tronditur qytetin e Diyarbakir-it, në juglindjen e dominuar nga kurdët në Turqi, duke shkaktuar disa të plagosur, sipas asaj çka shprehen dëshmitarë për “Reuters”.
Pas shpërthimit, një re e dendur tymi është ngritur përpjetë, në një zonë me shumë ndërtesa përreth. Në vendngjarje kanë shkuar menjëherë ambulancat dhe ekipet e emergjencës, ndërsa shkaku i shpërthimit nuk dihet ende.
Ngjarja në këtë qytet vjen pak ditë përpara referendumit për zgjerimin e pushtetit të presidentit Recep Tayyip Erdogan.
Shpërthimi ka ndodhur në rajonin qendror të provincës së Baglarit, ku nëntorin e kaluar një autobombë e militantëve të Partisë së Punëtorëve të Kurdistanit plagosi dhjetëra persona.
Diyarbakir është qyteti më i madh në juglindje të Turqisë, ku militantët e PKK-së kanë zhvilluar një kryengritje ndaj shtetit turk, prej më shumë se 3 dekada, me synimin për të kërkuar autonomi për kurdët.
