Shqipëria, një nga vendet e vogla të Evropës Juglindore, ka një reputacion negativ lidhur me korrupsionin dhe njihet gjerësisht si vend trafikues i drogës. Sipas Raportit të DASH, për 2017-tën, Shqipëria është burimi kryesor i kanabisit, si dhe vend tranziti për kokainën dhe heroinën, e destinuar për tregjet evropiane.
Duke komentuar raportin, kryeministri i Shqipërisë Edi Rama tha se “Shqipëria po dëshmon se ka bërë shumë në luftën kundër kanabisit” dhe ende mbetet shumë për t’u bërë.
Fqinji i Shqipërisë, Italia, është në ankth. Sipas prokurorit, Franco Roberti, rritja e trafikimit të drogës, kohët e fundit, nga Shqipëria drejt Italisë është bërë “shumë shqetësuese”. Më 27 mars, ai tha: “Ne kemi qenë kohët e fundit në Shqipëri me kolegët nga Bari dhe Catanzaro dhe shpresojmë që të nënshkruajmë një marrëveshje me qeverinë shqiptare”.
Lidhja midis kanabisit dhe korrupsionit ka çuar vendin në një krizë politike. Në janar, Rama shkarkoi ministrin e tij të Drejtësisë, Ylli Manjani, duke thënë se dëshironte të bashkëpunonte më mirë me Parlamentin për të çuar përpara reformën në drejtësi. Por, Manjani mendonte ndryshe. Ai akuzoi Ramën, duke e cilësuar hakmarrje shkarkimin e tij, pasi foli rreth rritjes së kanabisit dhe korrupsionit, edhe pse partia e tij nuk e kundërshtoi shkarkimin.
Shkarkimi i Manjanit u interpretua si një shenjë e rritjes së përplasjes mes socialistëve të Ramës dhe partnerëve të tyre të koalicionit, kur Manjani kërkoi ndërhyrjen e ushtrisë për të ndalur kultivuesit e kanabisit.
Ndërkaq Balili është i arratisuri që dyshohet se ka lidhje të rëndësishme me një organizatë të madhe të drogës. “Kur kam kërkuar arrestimin e tij, policët hëngrën dhe pinë në Santa Quaranta”, tha Manjani, duke iu referuar hotelit që drejtohet nga familja Balili.
CNN e ka cilësuar Balilin si Escobarin e Ballkanit – për rolin e tij të dyshuar si kreu i një rrjeti të trafikimit të heroinës. Policia shqiptare, thuhet se refuzoi të ekzekutojë urdhrin kundër Balilit, të lëshuar nga Greqia, duke e lënë atë të lirë.
Ndërkohë, situata e drogës në Shqipëri ka marrë vëmendjen e medias ndërkombëtare. Për shembull, BBC World Service bëri me dije se të ardhurat vjetore të drogës së prodhuar në Shqipëri janë vlerësuar në 5 miliardë euro. Rai 1, Deutsche Welle, Corriere della Sera, CNN Greqia, Frontex, La Republica dhe Huffington Post kanë raportuar, gjithashtu, për kultivimin e kanabisit në Shqipëri. Këto të fundit pohojnë se janë gjeneruar miliarda euro nga trafikimi që mund të financojnë zgjedhjet parlamentare të qershorit.
Më keq akoma, eksponentë të grupeve të krimit të organizuar kanë lidhje të forta me qeverinë duke marrë garanci se aktivitetet e tyre nuk do të preken – në këmbim të financimit të fushatës zgjedhore”.
Përshtatur nga redaksia e Tirana Today nga New Europe
Shkrimin në origjinal mund ta lexoni këtu: https://www.neweurope.eu/article/cannabis-corruption-albania/
