Liderët e G7 vazhdojnë përpjekjet për të bindur Rusinë që të distancohet nga presidenti Bashar Al Assad, pas sulmit me armë kimike në Siri.
Këtë të hënë, në Itali, takohen ministrat e Jashtëm të SHBA-së, Japonisë, Kanadasë, Italisë, Francës, Britanisë dhe Gjermanisë, në një samit dyditorë. Synimi është që të bindin presidentin Putin t’i japë fund mbështetjes ushtarake për Assadin dhe përshpejtimin e tranzicionit politik.
Boris Johnson, sekretar i Jashtëm britanik, pritet të kërkojë vendosjen e sanksioneve të reja për Rusinë, nëse Moska nuk bindet.
Gjithashtu, aleatët do të kërkojnë sqarime nga SHBA-ja për politikën që synon të ndjekë ndaj Sirisë, pas mesazheve të ditëve të fundit.
Mësohet se Sekretari i Jashtëm amerikan, Rex Tillerson, do të udhëtojë pas takimit drejt Moskës, ku do të takohet me homologun rus Lavrov, i cili do të theksojë se prioritet mbetet lufta kundër Shtetit Islamik.
Raportet mes Amerikës dhe Rusisë mbeten të tensionuara, pasi Tillerson kritikoi Moskën se dështoi të ndalonte Sirinë për të mos e kryer sulmin me armë kimike.
