Mazhoranca dhe opozita janë duke u përpjekur në hije për të arritur një marrëveshje midis tyre deri më datë 10 prill, që do të mund t’i jepte fund krizës politike.
Kreu i qeverisë, Edi Rama, dhe ai i opozitës, Basha, i kanë lëshuar publikisht kërkesa njëri-tjetrit për t’u takuar dhe dialoguar, por kushtet me të cilat ata e kërkojnë këtë takim, po i mban ende larg një kompromisi.
Nga “Çadra e Lirisë”, Lulzim Basha bëri të ditur se negociatori i opozitës kishte 36 orë që priste të deleguarin e mazhorancës për të diskutuar të gjitha detajet e takimit. Kërkesa për qeveri teknike e kreut të PD-së, Lulzim Basha, është një nga kushtet që nuk po arrihet drejt një pikëtakimi.
“I deleguari i opozitës pret prej 36 orësh që i deleguari i mazhorancës të ulen dhe të diskutojnë jo vetëm për orën dhe vendin e formatin, por mbi të gjitha për zgjidhjen e krizës përmes asaj që siç thatë ka pranuar të diskutojnë për formimin e qeverisë teknike dhe mandatin për zgjedhje të lira. Nëse ka rënë dakord ca e pengon të përgatisë takimin. Nëse nuk ka rënë dakord dhe e përdor si hile të bëhet prapë aktor i monologjeve le ta bëjë këtë nga zyra e Facebook, po opozita nuk bëhet fassadë dhe as alibi e monologjeve të Edi Ramës”, deklaroi Basha.
Ndërkohë që kryeminstri Rama është treguar i gatshëm për t’u takuar në çdo vend dhe në çdo kohë: “Lulëzim sot 3 ditë që pres vendin/orën për të nisur dialogun pa kushte! Gjejmë zgjidhje votojmë Vetingun shkojmë në zgjedhje. Mos ki frikë!”, i adresohej Rama, Lulzim Bashës nga zyra kryeministrore.
Megjithatë, negociatori i kryetarit të PD-së për takimin me kryeministrin Edi Rama, Oerd Bylykbashi, ka kontaktuar stafin e kryeministrit, për të përcaktuar modalitetet e takimit, që mund të zgjidhin krizën politike.
“Bylykbashi i ka paraqitur një shkresë zyrtare, stafit të kryetarit të qeverisë, përmes së cilës i kërkohet që të negociojë paprakrakisht me një person të kabinetit për modalitetet e takimit mes liderëve”, shkruan “Gazeta Shqiptare”.
Në këtë letër-kërkesë, Bylykbashi ka propozuar që vetë ai dhe një zyrtar i stafit të Ramës të bisedojnë paraprakisht për të rregulluar tryezën e dialogut. Ndërsa Bylykbashi ende nuk ka marrë një përgjigje zyrtare nga ana e stafit të kryeministrit.
Në fakt, përgjigjen ia dha vetë Edi Rama tek News 24: “Unë i them takohemi ku të duash e kur të duash, ai thotë jo, të takohen një herë stafet, pastaj takohemi ne. Këtë s’e marr vesh”.
Arsyet e dështimit të takimit i dekonspiroi “pa dashje” edhe vetë Lulzim Basha.
“Dua që Rama të vijë në tryezën e takimit me aktin e largimit si kryeministër dhe pranimit të qeverisë teknike”, tha Basha gjatë dialogut me protestuesit në çadër.
Pikërisht, ky kusht i vendosur nga Basha – pra largimi i tij me firmë e vulë para takimit – nuk i ka pëlqyer Ramës dhe ndaj ka sjellë pezullimin e negociatave. Teorikisht, bisedimet mes palëve dhe zgjidhja e krizës duhet të ndodhë para datës 10 prill.
Kjo datë shënon edhe afatin e fundit për regjistrimin e partive politike në KQZ, ndërsa afati për regjistrimin e koalicioneve parazgjedhore skadon më 19 prill.
