Inspektoriati i Punës ka publikuar një raport të detajuar, lidhur me tregun e punës në Shqipëri dhe raportet punëdhënës-punëmarrës.
Sipas këtij raporti, në vitin që lamë pas, rreth 70.000 punëmarrës më shumë kanë marrë shërbimin e inspektimit nga inspektorët e punës për të drejtat e tyre të ligjshme, ndërsa ka pasur një rritje të ndërgjegjësimit sa i takon cënimeve në vendin e punës, shkruan Blitz.al.
Në raportin e publikuar, vihet re se pjesën më të madhe e zënë ankesat lidhur me “cenim të marrëdhënieve të punësimit”, të cilat zënë 54.7%.
Një tjetër ankesë, që radhitet pas cenimit të marrëdhënieve të punës, është pikërisht “mospagesa e pagave të prapambetura”, e cila zë 21.2%, për të vazhduar më tej me ankesën lidhur me “ndërprerje të menjëhershme të marrëdhënieve të punës”, e cila zë 9.6%, siç duket edhe në tabelën e mëposhtme.
Më tej, në raportin e publikuar shkruhet se numri i subjekteve të sanksionuara, gjatë vitit 2016, ishte 117, me vlerë rreth 32 mln lekë, nga të cilat: 74 gjoba me vlerë 21.7 lekë në inspektimet e planifikuara, 27 gjoba me vlerë 6.5 mln lekë në inspektimet për shkak ankese, 16 gjoba me vlerë 3.7 mln lekë në inspektimet për shkak aksidenti.
Gjithashtu, në raport jepen të dhëna të tjera, lidhur me ankesat e mbërritura në ISHPSHSH apo me aksidentet në punë, të cilat vijojnë si më poshtë:
– Janë inspektuar 3700 subjekte më shumë krahasuar me një vit më parë.
– 1200 punëmarrës më shumë se një vit më parë, janë përfshirë në skemën e sigurimeve shoqërore dhe shëndetësore.
– Janë raportuar 117 subjekte, të cilat u evidentuan në të zezë, në të cilat 128 punonjës punojnë krejtësisht të pambrojtur.
– Është arritur të formalizohet marrëdhënia e punës për 98% të 475 punëmarrësve informal të konstatuar.
– Nga 353 ankesa të ardhura në ISHPSHSH, 236 prej tyre ose 67% u zgjidhën në favor të ankuesve.
– 124 subjekte më shumë se një vit më parë, kanë ngritur Këshillat e Sigurisë dhe Shëndetit në punë.
– 4700 subjekte më shumë se një vit më parë, përdorin pajisje mbrojtëse kolektive dhe individuale.
– 270 punëmarrës më pak janë konstatuar të diagnostikuar me sëmundje profesionale, krahasuar me një vit më parë.
– Këtë vit, 31 punëmarrës më pak të aksidentuar në punë.
