Rudina, vajza e Azem Hajdarit ka kujtuar të atin e vet me një fjalim të mbajtuara nga ai në qytetin e Shkodrës, pas ngjarjes së 2 prillit 1992. Pas kësaj ngjarje të rëndë, Hajdari i ka kërkuar Gramoz Ruçit, ministër i Brendshëm asokohe, të zbardhë ngjarjen. Vajza e vetë ka premtuar se të gjitha fjalimet e bëra nga Azemi do të mblidhen dhe do t’i vihen në dispozicion publikut.
Fjalimi i Azem Hajdarit në ’92:
I nderuar zoti Kryetar,
Të nderuar deputetë,
Të nderuara zonja dhe zotërinj, i nderuar trup diplomatik,
(incizimi nuk dëgjohet.) …për demokracinë dhe jam shumë i lumtur që kombi ynë do të jetë një komb demokratik; pushoi diktatura e proletariatit.
Për të mos e zgjatur më tepër, unë flas këtu, sepse në zonën time ka vdekur ai që ka votuar për mua një ditë më përpara. Jam interesuar në hetuesi, ky djalë gjatë gjithë aktivitetit të tij nuk ka bërë asnjë akt të kundërligjshëm. Rrjedh nga një familje e varfër, punëtore dhe u vra në rrugë nga njerëz të porositur.
Vëllezër deputetë, e quaj të domosdoshme t’ju quaj “vëllezër”, sepse nuk po flas nga pozita partiake. E quaj të domosdoshme, sepse po flas në emër të popullit, duke e quajtur veten djali i tij, djali i Shkodrës, duke e quajtur veten se do të jem në gjendje të luftoj për realizimin e aspiratave demokratike, të asaj pjese që më dha votëbesimin. Ju them “vëllezër” se Shqipëria do vëllezër, sidomos në një parlament pluralist. Është nder për ne që ta çojmë Shqipërinë përpara. Kërkoj që të japë shpjegim për këtë problem sekretari i Komitetit Qendror të Partisë së Punës, deputeti Xhelil Gjoni. Kërkoj që për këtë problem të japë shpjegim ministri i Punëve të Brendshme, zoti Gramoz Ruçi. Kërkoj që për këtë problem të japë shpjegim kryetari i Hetuesisë së Përgjithshme, Rrapi Mino. Nuk duhet të bëj përgjegjës këta shokë që do të japin shpjegime, por kam dëshirë që nga goja e tyre, si funksionarë të lartë të deritanishëm, të marrin informacion për masat, si i gjykojnë këta njerëz këto ngjarje, cili ishte qëndrimi i tyre kur ndodhën këto ngjarje. Gjithashtu, këtu kërkoj të thërres ndërgjegjen e ndonjërit që mund të ketë thënë edhe “vraje qenin!”. Nuk keni pse na vrisni. Ne luftojmë me metoda demokratike. Ne jemi bijtë e popullit, nuk keni pse na shani. Ne duhet të bashkëjetojmë, jemi parlament pluralist. Kërkoj edhe një herë, në rast se e lejon procedura e mbledhjes, për të mbajtur 1 minutë heshtje për këto viktima të terrorit shtetëror, përderisa edhe ju i keni quajtur një akt të dhimbshëm. Të mbajmë 1 minutë heshtje për shpirtin e tyre, për një student 24-vjeçar, që do të ishte një intelektual i shquar, por që ra viktimë e terrorit shtetëror. Unë për këtë kërkoj shpjegime dhe kërkoj nga ky komision të dalë skenari i parapërgatitur. E përshëndes komisionin e deputetëve që do të krijohet.
Faleminderit për vëmendjen!
