Deputeti i Parlamentit grek, Vassilios Giogiakas, ka përcjellë një mesazh mbështetjeje nga kryeministri i Greqisë, Kyriakos Mitsotakis, dhe partia në pushtet “Demokracia e Re”, gjatë punimeve të Kuvendit Kombëtar të Partisë Demokratike në Tiranë. Në fjalën e tij përpara delegatëve, Giogiakas vlerësoi procesin e modernizimit dhe përtëritjes së strukturave të opozitës shqiptare, duke e cilësuar këtë kuvend si një moment të rëndësishëm të pjesëmarrjes demokratike.
Gjatë fjalimit, deputeti grek vuri në dukje se partitë e qendrës së djathtë në Europë ndajnë parime të përbashkëta si pluralizmi politik, shteti i së drejtës, llogaridhënia dhe ekzistenca e institucioneve të pavarura. Ai rikonfirmoi se Athina zyrtare mbështet në mënyrë të vazhdueshme perspektivën europiane të Shqipërisë dhe progresin e bërë në negociatat për anëtarësim me Bashkimin Europian, duke e cilësuar këtë proces si një rrugë drejt konsolidimit demokratik dhe pjekurisë institucionale.
Më tej, Giogiakas u ndal te disa shtylla thelbësore që duhet të përmbushë çdo vend kandidat, ku veçoi pavarësinë e gjyqësorit, luftën ndaj korrupsionit, transparencën dhe garantimin e një sistemi efikas të kontrollit dhe balancës së pushteteve. Ai nënvizoi gjithashtu rëndësinë e zhvillimit të zgjedhjeve të lira e të ndershme, si dhe mbrojtjen e rolit të opozitës parlamentare dhe të drejtës së saj për shprehje politike paqësore.
Në kuadër të respektimit të standardeve evropiane, ligjvënësi grek theksoi se respektimi i të drejtave të pakicës greke në Shqipëri, përfshirë të drejtën e pronës, arsimit dhe pjesëmarrjes në jetën publike, mbetet një çështje me rëndësi parësore për Greqinë dhe vetë Bashkimin Europian. Në mbyllje të mesazhit, Giogiakas uroi mbarësi në punimet e Kuvendit të PD-së dhe shprehu vullnetin për forcimin e mëtejshëm të lidhjeve politike dhe fqinjësore mes dy vendeve.
