Re të dendura tymi të zi janë shfaqur sërish pasditen e sotme në zonën e Milotit, duke mbuluar dhe autostradën që përshkon këtë zonë. Pamjet tregojnë djegie të gomave të makinave, një situatë që sipas banorëve po përsëritet vazhdimisht.
Nuk është hera e parë që ndodh një fenomen i tillë. Djegia e materialeve të ndryshme në këtë zonë është kthyer në një problem të përsëritur, që prej kohësh shqetëson banorët dhe drejtuesit e mjeteve që kalojnë në këtë segment rrugor, për shkak të ndotjes së madhe të ajrit dhe rrezikut që mund të krijojë për qarkullimin.
Bashkia Kurbin, Policia e Shtetit, Inspektorati Kombëtar i Mbrojtjes së Territorit, Agjencia e Mjedisit dhe organet e drejtësisë nuk kanë dhënë ende një reagim zyrtar mbi rastin dhe as për personat që mund të qëndrojnë pas këtyre djegieve.
Situata ka sjellë shqetësime tek banorët e zonës, pasi ndotja e ajrit dhe rreziku për shëndetin mbeten të larta sa herë që ndodhin episode të tilla.
