Drejtori i Përgjithshëm i Doganave, Besmir Beja, priti në një takim zyrtar të Ngarkuarën me Punë të Ambasadës së Shteteve të Bashkuara në Shqipëri, Nancy VanHorn. Në fokus të bisedës ishte forcimi i bashkëpunimit dypalësh në fushën e administrimit doganor, sigurisë kufitare dhe lehtësimit të tregtisë.
Gjatë takimit, Beja prezantoi prioritetet kryesore të Doganës Shqiptare, duke theksuar modernizimin e shërbimeve doganore, rritjen e transparencës dhe integritetit institucional, si dhe përmirësimin e klimës së biznesit përmes procedurave të thjeshtuara dhe të standardizuara.
Po ashtu, ai nënvizoi angazhimin e Doganës Shqiptare në luftën kundër trafiqeve të paligjshme, kontrabandës dhe korrupsionit, si dhe në garantimin e kontrollit efektiv të lëvizjes së mallrave në përputhje me standardet ndërkombëtare të sigurisë.
Palët diskutuan gjithashtu mbi mundësitë për thellimin e asistencës teknike amerikane, shkëmbimin e praktikave më të mira dhe zhvillimin e projekteve që synojnë rritjen e eficiencës së administratës doganore dhe lehtësimin e tregtisë së ligjshme.
