Shirat intensive gjatë ditës së sotme kanë mbajtur në nivele të larta prurjet në lumenjtë e qarkut Fier. Ndërkohë, situata në Memaliaj duket më e qetë, ku raportohet një ulje e nivelit të Vjosës, ndërsa në Urën e Mifolit situata paraqitet e përkeqësuar.
Gazetarja e Klan News Anila Sefa raporton se sipas matjeve të fundit, Vjosa ka arritur kuotën 8.2 metra, duke shënuar një rritje të ndjeshme dhe duke rritur rrezikun për përmbytje në zonat përreth.
Ekspertët paralajmërojnë se nëse prurjet vazhdojnë me intensitet të lartë, niveli i lumit mund të rritet më tej, duke rrezikuar tokat bujqësore dhe banesat pranë lumit.
Autoritetet po monitorojnë situatën në kohë reale dhe bëjnë apel ndaj banorëve që të tregojnë kujdes, të ndjekin udhëzimet e dhëna nga institucionet përgjegjëse dhe të evitojnë zonat e rrezikuara.
