Një zjarr është regjistruar sot pranë Qendrës Rezidenciale Lira në Berat, ku strehohen persona me aftësi ndryshe. Persona ende të paidentifikuar kanë djegur disa goma në afërsi të kësaj qendre, duke shkaktuar alarm dhe shqetësim në zonë.
Pas njoftimit të marrë nga edukatorja e institucionit, në vendngjarje mbërritën me shpejtësi shërbimet zjarrfikëse, të cilat arritën të lokalizojnë dhe të shuajnë flakët në kohë, duke shmangur përhapjen e mëtejshme të zjarrit dhe dëmtimin e qendrës.
Nga ngjarja nuk raportohet për dëme materiale apo të lënduar, por zjarri ka shkaktuar ndotje të konsiderueshme mjedisore, me retë e zeza të tymit që përfshinë gjithë zonën përreth.
Policia e Beratit ka nisur hetimet dhe është duke punuar për identifikimin dhe kapjen e autorit ose autorëve të këtij akti.
