Kreu i Partisë Demokratike Sali Berisha ka deklaruar se procesi zgjedhor i 11 majit është një “farsë elektorale” e ndikuar thellësisht nga kartelet e drogës dhe krimi i organizuar.
Në një deklaratë për mediat, Berisha ka akuzuar se ka qenë karteli “Troplini”, të cilin e quan “më të fuqishmin e kokainës në Ballkan dhe ndër më të fuqishmit në Europë”, për ndërhyrje të drejtpërdrejtë në rezultatin zgjedhor në Durrës.
Sipas Berishës, kandidati i këtij karteli, Arkend Balla – të cilin ai e identifikon si pjesë të familjes Troplini – ka marrë rreth 21 mijë vota, duke e tejkaluar me 5 mijë vota vetë kryeministrin Edi Rama, që sipas tij ka marrë 15 mijë vota në këtë zonë në vitin 2021.
“Kandidati i kartelit Troplini, që në 2021 mori vetëm 2.500 vota, sot del me 21 mijë. Si ka mundësi? Si mund të flitet për zgjedhje të lira, kur një person i njëjtë, pas ndryshimit të mbiemrit, tejkalon Edi Ramën me mijëra vota?” – u shpreh Berisha.
Përpjekjet për të injoruar ndikimin në farsën elektorale të karteleve të drogës, organizatave dhe grupeve kriminale, të koordinuara nga Ergys Agasi, përbëjnë një krim tjetër madhor dhe të shëmtuar, dimension tipik të farsës elektorale të narkoshteteve.
Kandidati i kartelit Troplini, karteli më i fuqishëm i kokainës në Ballkan dhe ndër më të fuqishmit në Europë, i cili është i vetmi kartel me port në dispozicion, është karteli që kontrollonte në çdo metër katror portin e Durrësit, është karteli që bënte çdo emërim dhe anulonte çdo shkarkim në këtë port, duke filluar nga pozicioni i fshesarit te vinçieri, drejtori dhe me radhë.
Është karteli që kontrollon me dhjetëra biznese të paprekura nga Altin Dumani.
Është karteli që një vit më parë do gjendej me 3 milionë euro dhe që nuk u ndodhi asgjë.
Ky kartel kishte përcaktuar Arkend Ballën si ministër të ardhshëm të Brendshëm të Shqipërisë.
Në marrëveshjen Agasi-Rama-Doçi, që është nipi i Troplinëve, por eksponent i spikatur, perandoria e kartelit Troplini shtrihet nga Peruja në Europën e Veriut.
Pra, ky kartel nxori Arkend Ballën 5 mijë vota më të votuar se Edi Ramën në vitin 2021.
Po, Edi Rama mori 15 mijë vota.
Arkend Troplini mori 21 mijë vota.
Shikoni se çfarë krimi monstruoz bën propaganda.
Kërkon t’u shesë shqiptarëve për zgjedhje këtë farsë të shëmtuar droge dhe krimi.
Arkend Troplini, në vitin 2021, si Arkend Balla, mori gjithsej 2500 vota.
Dhe kur u konvertua në Arkend Troplini, mori 21 mijë vota.
A ka më pafytyrësi se sa të bësh avokatinë e këtij procesi?
Çfarë morali u mbetet avoketërve të këtij procesi?
Avoketërit e Troplinit në gjykatë janë me ligj, paguhen prej tij dhe është normale se nuk duhet të ketë njeri pa avokat.
Por avoketërit e tij në studio, të cilët duan t’u servirin shqiptarëve një proces elektoral të tillë si sukses të qeverisë, janë të denjë për çdo epitet.
Si mundet të flasin për zgjedhje?
Si mund të flasin për fitore zgjedhjesh, kur i njëjti person ka marrë 2500 vota në vitin 2021, dhe pasi ndërron mbiemrin në Arkend Troplini, merr 21 mijë vota. Tejkalon me 5 mijë vota Edi Ramën.
