Disa ditë pas ngjarjes tragjike në spitalin e Shkodrës, ku një fëmijë 3-vjeçar humbi jetën, ka reaguar babai i tij, Samed Hasmegaj, i cili mohoi shkrimet e mediave se vdekja e djalit mund të ketë ardhur nga përdorimi i një bari për minjtë.
Ai theksoi se nuk ka informacion të qartë për shkakun e vdekjes dhe kërkoi që të mos përhapen spekulime të pabaza.
“As vetë nuk e di se çfarë ka ndodhur me djalin. Mediat kanë abuzuar me lajmet, unë vetë nuk i kam parë, por më kanë thënë të afërmit që në lajme thuhet se djali ka ndërruar jetë nga ilaci që mund të kem përdorur për minjtë, kjo nuk është e vërtetë. Mjekët më thanë në fillim se ndoshta mund të ketë qenë një gjendje gripale, por nuk e di. Pritet të më thonë më shumë mjekët. Vajza është ende në gjendje të rëndë, mjekët nuk më kanë thënë ende se sa do të qëndrojë në spital. Edhe bashkëshortja është në spital dhe ndodhet në një gjendje jo të mirë shëndetësore.”, tha ai.
Gjithashtu kanë reaguar edhe familjarët e 3-vjeçarit, duke hedhur poshtë aludimet se mjekët nuk e kanë trajtuar siç duhej fëmijën duke u shprehur se ngjarja është një fatkeqësi për familjen.
Ata konfirmuan se nuk kanë asnjë pretendim ndaj spitalit të Shkodrës dhe e falënderuan stafin mjekësor për përpjekjet e bëra.
Ndërkohë, ata kërkuan që mediat të tregohen të kujdesshme në raportimin e ngjarjes, duke pasur parasysh gjendjen e rënduar shëndetësore të vajzës dhe shtatzëninë e nënës së fëmijëve. “Çdo lajm i pavërtetë mund të ndikojë negativisht në shëndetin e saj,” thanë ata.
Gjendja shëndetësore e vajzës 7-vjeçare, e cila dyshohet të jetë helmuar së bashku me vëllanë 3-vjeçar, vijon të jetë e rëndë.
Ajo ndodhet aktualisht në QSUT në Tiranë, ndërsa djali ka ndërruar jetë në spitalin rajonal të Shkodrës më 22 shkurt. Sipas informacionit nga spitali, fëmijët janë paraqitur për herë të parë për ndihmë mjekësore më 21 shkurt rreth orës 18:30.
Pas ekzaminimit, mjekët konstatuan simptoma të ngjashme me virozat e stinës, përfshirë të vjellat dhe komplikacione të tjera.
Mjekët kërkuan që djali 3-vjeçar të qëndronte në spital, por babai e refuzoi dhe e mori fëmijën në shtëpi, duke firmosur refuzimin e hospitalizimit në kartelën shëndetësore.
Një ditë më vonë, fëmijët u paraqitën përsëri në spital në gjendje të rënduar. Djali, i cili ishte sjellë në gjendje kritike, ka ndërruar jetë 15 minuta pas pranimit.
Vajza 7-vjeçare u dërgua me urgjencë në Tiranë, ku ndodhet aktualisht nën kujdesin intensiv.
Sipas burimeve mjekësore, një përmirësim i gjendjes shëndetësore të vajzës është raportuar këtë të martë, ndërkohë që ajo vazhdon të mbetet nën mbikëqyrjen e mjekëve në QSUT.
Prokuroria ka nisur hetimet lidhur me veprimet e mjekëve dhe për shkaqet e ngjarjes tragjike.
