Kryeministri Edi Rama ka reaguar ndaj akuzave që ulja e çmimit të energjisë është një masë elektorale.
Ai ka theksuar se Partia Socialiste (PS) do të sigurojë fitoren e ardhshme me një rezultat të thellë dhe diferencë të madhe nga kundërshtarët. Rama ka sqaruar se gjatë dekadës së tij në pushtet, çmimi i energjisë nuk është rritur, por është mbajtur i pandryshuar në nivelin 9.5 lekë, që ishte më i ulët se çmimi që gjeti kur erdhi në detyrë (13.5 lekë). Ai theksoi se çmimi i energjisë ka pësuar rritje në shumë vende të botës pas agresionit rus, ndërsa Shqipëria ka qenë e vetmja që ka ulur çmimin për familjarët.
Rama kundërshtoi akuzat se kjo ulje është e lidhur me zgjedhjet dhe kërkoi që të tjerët të provonin me fakte se ka ndërmarrë veprime të natyrës elektorale që shkojnë kundër logjikës ekonomike dhe financiare të vendit. Ai përmendi se gjatë periudhës së pushtetit të tij, nuk ka pasur asnjë masë që është hequr pas zgjedhjeve. Sipas Ramës, ulja e çmimit të energjisë është një masë e rëndësishme për qytetarët, duke përfshirë pensionistët që do të përfitojnë nga një shtesë mbi pensionin e tyre falë kësaj uljeje.
“E para, ne nuk e kemi ngritur asnjëherë çmimin e energjisë elektrike. Kemi mbajtur një dekadë rresht çmimin fiks 9.5 lekë që për shumicën dërrmuese ishte më i ulët sesa çmimi që gjetëm kur erdhëm në detyrë prej 13.5 lekësh. E dyta, çmimi jo vetëm që nuk është ulur në të gjithë botën por është rritur në shumë vende pas agresionit rus. Ndërkohë kjo e jona është ulja e vetme në Evropë e çmimit të energjisë elektrike për familjarët të paktën që nga fillimi i luftës në Ukrainë.
E treta, kush thotë që kjo është ulje elektorale duhet të më gjejë në tërë këto vite një veprim të kësaj natyre me karakter elektoral që të kem bërë për vota kundër logjikës ekonomike, financiare të vendit ose një rast kur një masë pozitive që kemi marrë përpara një procesi zgjedhor ta kemi hequr pas fitores së zgjedhjeve. Nuk ka! Mos kërkoni kot se nuk ka ndodhur. Dhe të mos harroni diçka tjetër, kur unë s’i kam bërë këto më parë, kur kisha edhe tjerë në prehër, do t’i bëj në prag të zgjedhjeve kur do të marrim fitore e 10-të radhazi që do të ketë notën 10 për nga thellësia e rezultatit dhe diferenca me kundërshtarët. Nuk bën vaki. E fundit, llafet i merr era por mua rëndësi ka fakti se që nga shkurti mbi 1 milion konsumatorë familjarë do të paguajnë më pak për energjinë elektrike ndërsa pensionistët do të kenë pension minimal plus nga kjo ulje e çmimit.“, tha Rama.
