Ushtria e Izraelit tha sot se është e gatshme për ta mbrojtur vendin dhe për t’u përgjigjur, nëse Irani hakmerret për një sulm vdekjeprurës në konsullatën iraniane në Siri. Teherani e fajëson Izraelin për sulmin ajror në konsullatën e saj në Damask në fillim të këtij muaji.
Izraeli nuk e ka komentuar këtë sulm, por ushtria amerikane beson se sulmi u krye nga Izraeli. Rritja e tensioneve ka shkaktuar shqetësime ndërkombëtare se lufta shkatërruese e Izraelit në Rripin e Gazës kundër Hamasit – i cili është shpallur organizatë terroriste nga Shtetet e Bashkuara dhe Bashkimi Evropian – mund të përhapet në tërë Lindjen e Mesme.
Konsullata iraniane në kryeqytetin sirian Damask u shkatërrua nga një sulm i dyshuar izraelit më 1 prill.
Shtatë pjesëtarë të Trupave të Gardës Revolucionare Islamike të Iranit (IRGC), përfshirë dy gjeneralë, u vranë si pasojë.
Lideri suprem i Iranit, Ayatollah Ali Khamenei, u zotua për hakmarrje pas sulmit, duke thënë se Izraeli do të “ndëshkohet nga duart e burrave tanë guximtarë”.
Presidenti i Shteteve të Bashkuara, Joe Biden, paralajmëroi të enjten se Irani po kërcënon ta kryejë një “sulm të madh” si përgjigje ndaj sulmit në konsullatën e tij në Damask. Presidenti amerikan i ka premtuar Izraelit mbështetje të “palëkundshme” amerikane, përballë kërcënimeve për sulm të mundshëm nga Irani.
“Ne do të bëjmë gjithçka që mundemi për ta mbrojtur sigurinë e Izraelit”, tha Biden.
